Стотици реки ширум светот содржат загрижувачки концентрации антибиотици, според истражувањето на Универзитетот во англискиот град Јорк. Примероците на речната вода се земени на 711 локации во 72 земји. Кај повеќето од нив се пронајдени антибиотици. На 111 локации е надминато дозволеното ниво, во некои случаи и за 300 проценти.
Антибиотиците завршуваат во водата преку човечки и животински измет, преку протекување во постројките за третман на вода и преку производителите на лекови кои го испуштаат отпадот. Ова создава ризик бактериите да станат отпорни на антибиотици. Тогаш веќе не може ефективно да се бориме против сериозните болести.
Најчесто пронајден антибиотик е триметоприм, кој главно се користи за лекување на циститис. Пронајден е во 307 од 711 примероци.
Најзагадени со антибиотици реките се во Африка и Азија. Истражувачите најдоа најголема количина во Бангладеш, каде безбедното ниво на лекот метронидазол, кој се користи за лекување на инфекции на кожата, е надминато за повеќе од 300 пати. Реките во Кенија, Гана и Пакистан, исто така, се покажаа како силно загадени.
Од тестираните реки во Европа, откриено е дека 8 проценти ги надминуваат безбедното ниво на антибиотици. Примерокот земен од Дунав во Австрија беше најтешко контаминиран со седум различни видови на антибиотици. Мешавина од пет антибиотици е пронајдена и во британската река Темза, која често се гледа како чиста река.
Истражувачите нагласуваат дека не се опасни само високите вредности. Дури и при помали вредности со антибиотици, постои ризик бактериите да станат отпорни. Минатиот месец Обединетите нации предупредија дека десет милиони луѓе би можеле да умрат од отпорност на антибиотици до 2050 година.
Извор: NOS.nl