Honderde riviere wêreldwyd bevat kommerwekkende konsentrasies antibiotika, volgens navorsing van die Universiteit van die Engelse stad York. Rivierwatermonsters is by 711 plekke in 72 lande geneem. Antibiotika is in die meeste van hulle gevind. Die toegelate vlak is by 111 plekke oorskry, in sommige gevalle met soveel as 300 persent.
Die antibiotika beland in die water deur menslike en dierlike ontlasting, deur lekkasies by watersuiweringsaanlegte en deur vervaardigers van medisyne wat afval uitstoot. Dit skep die risiko dat bakterieë weerstandig sal word teen die antibiotika. Ernstige siektes kan dan nie meer doeltreffend bekamp word nie.
Die mees algemene antibiotika is trimetoprim, wat hoofsaaklik gebruik word om sistitis te behandel. Dit is in 307 van 711 monsters gevind.
Die riviere wat die meeste met antibiotika besoedel is, is in Afrika en Asië. Die navorsers het die grootste hoeveelheid in Bangladesj gevind, waar die veilige vlak van die middel metronidasool, wat gebruik word om infeksies van die vel te behandel, met meer as 300 keer oorskry is. Riviere in Kenia, Ghana en Pakistan was ook erg besoedel.
Van die riviere wat in Europa getoets is, is gevind dat 8 persent veilige vlakke van antibiotika oorskry. Die monster wat uit die Donau in Oostenryk geneem is, was die ergste besmet met sewe verskillende tipes antibiotika. 'n Mengsel van vyf antibiotika is ook in die Britse Teemsrivier gevind, wat dikwels as 'n skoon rivier gesien word.
Die navorsers beklemtoon dat nie net hoë waardes gevaarlik is nie. Selfs teen laer waardes met antibiotika is daar 'n risiko dat bakterieë weerstandig sal word. Verlede maand het die Verenigde Nasies gewaarsku dat tien miljoen mense teen 2050 weens antibiotikaweerstandigheid kan sterf.
Bron: NOS.nl